Mhort Brus An Coimin Ruadh aig Cill nam Manach Liath

Air 10 Gearran choinnich Raibeart Brus agus Iain Coimin, Tighearna Bhàideanaich, aig Eaglais nam Manach Liath ann an Dùn Phris. Cha robh meas mòr sam bith aca air a chèile. B' e Brus a bh' air iarraidh gun coinnicheadh iad agus dh’fhàg an dithis an claidheamhan air taobh a-muigh na h-eaglais mus deach iad a-steach.

Thòisich an t-sabaid aig an àrd-altair agus shàth Brus An Coimin Ruadh.

An uair a thug Brus ceum a-mach às an eaglais agus a dh’innis e do chuideachd fhèin mar a thachair, thuirt Roger de Kirkpatrick, ‘You doubt. Ise mac siccar.’ (‘Nì mise cinnteach.’) Choisich Kirkpatrick a-steach don eaglais airson a bhith cinnteach gun robh An Coimin Ruadh marbh. Chaidh bràthair màthar Choimin a mharbhadh le Sir Crìsdean Seton, neach-taice do Bhrus.

Tha e do-dhèanta fios cinnteach a bhith aig duine dè dha-rìribh a thachair ann an Eaglais nam Manach Liath an latha ud. Chan eil aonta am measg luchd-sgrìobhaidh eachdraidh mun chùis agus fad cheudan de bhliadhnaichean tha eachdraichean air a bhith ag argamaid mu na thachair, agus a' ceasnachadh carson a thachair e. An robh plana aig Brus Coimin a mhort agus an rìgh-chathair a ghabhail? An do tharraing An Coimin Ruadh a bhiodag fhèin an toiseach?

Thuirt litir bhon chùirt Shasannach chun Phàip gun ‘dh’èirich Brus an aghaidh Rìgh Eideird mar neach-brathaidh, agus gun do mhort e Sir Iain Coimin, Tighearna Bhàideanaich, aig an àrd-altair ann an eaglais nam Manach Liath ann am baile Dhùn Phris seach nach aontaicheadh Iain ris an fheall a bha Brus ag ullachadh... a dhol a chogadh a-rithist... agus esan a bhith na rìgh air Alba.’

Brùth air an ìomhaigh airson dealbh nas motha fhaicinn.