Na Lochlannaich – Diathan agus ban-diathan

Bha na Lochlannaich a' creidsinn ann an diathan agus ban-diathan mòra a bha ag òrdachadh mar a dheigheadh an saoghal air adhart. Dh’fhaodadh dùil a bhith aig curaidhean a fhuair bàs glòrmhor ann am blàr a bhith aig cuirm còmhla ris na diathan ann an Valhalla, talla chumhachdach nam marbh. Bhiodh na Valkyries, curaidhean a bha nan òighean, a' lìonadh an adharcan-òil le meadh. 'S e Odin, dia cogaidh, bàrdachd agus gliocais an dia Lochannach a bu mhìorbhailiche. Bha e cuideachd air ainmeachadh mar:

• ‘Fear na h-aona sùla’ airson gun robh e air sùil a thoirt seachad gus am faigheadh e fiosrachadh agus gliocas
• ‘Am fear tul-eòlach’, airson gun robh an dà fhitheach aige (Huginn agus Muninn – ‘Smuain’ agus ‘Cuimhne’) a' sgialaich timcheall an t-saoghail tron latha agus a' toirt naidheachdan air ais do dh' Oidin gach oidhche
• ‘Tighearna nan croich’ airson gun robh an cumhachd aig Odin a bheireadh air daoine a bh' air an crochadh innse an sgeul-rùin an deidh am bàis.

'S e dia nan tàirneanach, nan stoirmean, agus na gaoithe a bh' ann an Thor, aon de mhic Odin. Bha e na dhia deatamach do sgiobaidhean Lochlannach, a bhiodh ag ùrnaigh ris mus fhalbhadh iad air turais-mara, eadhon an dèidh dhaibh tionndadh gu bhith nan Crìosdaidhean. Bha carbad-cogaidh Thor air an slaodadh le dà ghobhar. Bhiodh e a' cath ris na fuamhairean le òrd cumhachdach, Mjollnir.

Uaireannan bhiodh na Lochlannaich a' cur orra ìomhaighean de an diathan agus dem ban-diathan. Chaidh prìne cnàimh ann an cumadh tuagh Odin a lorg aig làrach an tuineachaidh Lochlannaich aig Jarlshof ann an Sealtainn.

Èist ris a’ chantele, seann ionnsramaid à Fionnlann, air a chluich.